عروسة الرمل
----------------------------------------------------------------------------------------------------------
المُرَوِّض
مخلوق من طين
اتعفْرتْ
بقى مخلوق من نار
والفعل الإنساني
اتجمد
بقى من فَخّار
أفكاره بتغوي أبالسة
وجانْ
أشرار
تعويذة غريبة
نارها طابور
الظالم بقى
مظلوم ظالم
وماعدش هناك
مظلوم
مظلوم
تعويذة من وسواس
خناس
فنلاقي الناس
كرابيج من ناس
بتكربج ناس
وتطاطي فـ ناس
فَتْصَقَّف ناس
وتعيَّط ناس
وقليل الحيلة
دعَكْ مصباحه
اتحول خادم
للمارد
فلا عارف يبقى
مخاوي الجن
ولا عارف حتى
يخاوي الناسْ
فيموت إحساس
ويعيش البرد
مخيم فوق
السما
والأرض
والرعد فـ صوته
آلام الكل
والبرق يحاول
إنه ينور خيمة
البرد
ويكشف عنا
جناح الذل
وإله الخير
ضعفان عدمان
محتاج قرابين
محتاج لخلاصه
لاجل يخلَّص بيه
الكل
والكل فــ ذكرى
آلام الماضي
ومُر الحالي
وخوفه من أشباح
الجاي
محبوس في اقفاصْ
متحاطة بشوك من
همِّ وهم
أصوات مبحوحة يا دوب
بتخرَّج
حس المعنى فــ
نبرة آه
ودهور منحوتة عذاب
في عذاب
متسجل فيها حكاية
الناس
من بدء الناس
وليوم الناس
"أطياف
بتدور من لحم ودم"
أطماع من نار
اجتاحت فينا كل
الكل
وفــ كل زمان
الخضرا بتنجا
كتير م النار
وعشان الخضرا
ماهيش منَّا
تلقانا فــ
نار...
------------------------------------------------------------------------------------------------------------
لاعب الحبل
ندَّاهة
وساقت جبروتها
واخداكْ
أَسراكْ
وقيودها هلاكْ
وصراط دوبانْ
والمخرج آخره
نار ونحاسْ
وعشان ما تحقق كل احلامكْ
تبقى لفوقْ
هاتنِخ
تطاطي
توطي
لتحتْ
فتغمِّي حواسك
وتهد الحلم السابق ضي عنيك
مكسورْ؟
ندمانْ؟
وما عدش حزامك
ينفع وسطكْ؟
ليه يتشد؟
مكسور الوسطْ
الوسط الحالي
شمال X
شمالْ
فغروب وغيابْ
ولإنك متغرب
جوَّاكْ
وهروبك
سابق ملامحها
فالكل هروب
ولإنك على حبلك
هامش
لتْبَات ظالم
لتبات مظلومْ
طمعان في الهامش؟
الهامش كله
كاسات بتدورْ
في طبق مسحورْ
والكل هيشربْ
لاجل ما يبقى يا
ناس مطيورْ
خسران؟
مسكينْ!
شخشيخة فـ إيد
الخوف والجانْ
والخوف دَجَّال
ع الكرسي كسيح
وسلاحه كلام X كلام
هوَّالْ
بيهزّ كيانَّا
نقوم ننداس
والوصفة بخورْ
فنبخَّر كل فشلنا
عشان ننداس
ونعلق كل أملنا
بكل حبال الخوف
الدايبة
نقوم ننداسْ
وعشان انا أعمى
وما شفتش
الكل بيلعب
ع الحبال
ولإن لزوم الكلمة
على الملزوم
فكلامي خلاص
ما بقاله لزوم
-------------------------------------------------------------------------------------------
